उपराष्ट्रपति झासँग प्रधानमन्त्री ओलीको भेट

काठमाडौँ, २७ असोज । नवनियुक्त प्रधानमन्त्री केपी शर्मा ओलीले आज उपराष्ट्रपति परमानन्द झासँग शिष्टाचार भेट गर्नुभएको छ ।

उपराष्ट्रपति भवन बहादुरभवनमा भएको सो भेटमा नयाँ सरकारले संविधानप्रति असन्तुष्ट आन्दोलनरत तराई मधेस केन्द्रित दललाई वार्ताका लागि आह्वान गरेको र अन्य दलसँग समन्वय गरी सरकार सञ्चालन गर्न लागेको विषयमा प्रधानमन्त्री ओलीले जानकारी गराउनुभएको थियो ।

सो अवसरका उपराष्ट्रपति झाले ओलीको सफल कार्यकालका लागि शुभकामना दिनुभएको प्रधानमन्त्रीको सचिवालयले जनाएको छ । यही असोज २४ गते निर्वाचित भएपछि प्रधानमन्त्री ओलीले उपराष्ट्रपति झालाई पहिलोपटक भेट गर्नुभएको हो । उहाँले मङ्गलबार राष्ट्रपति डा रामवरण यादवलाई शिष्टाचार भेट गर्नुभएको थियो ।
प्रधानमन्त्री ओली–नेमकिपा नेता बिजुक्छे भेटवार्ता

प्रधानमन्त्री केपी शर्मा ओली र नेपाल मजदुर किसान पार्टीका अध्यक्ष नारायणमान बिजुक्छेबीच आज भेटवार्ता भएको छ । बालकोटस्थित प्रधानमन्त्री निवासमा भएको भेटवार्तामा भारतले गरेको नाकाबन्दी हटाउन कूटनीतिक पहल थाल्नुपर्ने र भारतबाहेक पनि अन्य विकल्प खोज्नु पर्ने बारेमा छलफल भएको छ ।

भेटवार्तामा सहभागी नेमकिपाका सचिव सुनिल प्रजापतिले भारतको नाकाबन्दी खोल्न पहल गर्नुपर्ने, पेट्रोलियम पदार्थको आयातमा भारतसँग मात्रै निर्भर नभई चीनलगायत अन्य देशसँग पनि विकल्प खोज्नु पर्नेबारेमा छलफल भएको जानकारी दिनुभयो । प्रजापतिले भन्नुभयो, “सरकार चीनसँगको नाका खोल्न र विकल्प खोज्न अगाडि बढ्नुपर्ने बारेमा छलफल भयो, त्यसमा प्रधानमन्त्री ओली सकारात्मक हुनुभयो ।”

भेटका अवसरमा उहाँहरुबीच दलहरुबीच राजनीतिक संयन्त्र बनाउने र संयन्त्रको निर्णयानुसार अगाडि बढेमा सरकार स्थिर हुनुका साथै जनताको भावनाअनुसार काम गर्न सकिने बारेमा समेत छलफल भएको थियो ।

करिब ४५ मिनेट भएको भेटवार्तामा देशको शिक्षालाई परम्परागत शैलीभन्दा पनि अहिलेको आवश्यकताअनुसार परिमार्जन गरेर लैजाने र स्वास्थ्य तथा शिक्षामा जनताको पहुँच हुनुपर्नेमा कुराकानी भएको थियो ।भेटमा प्रधानमन्त्री ओली तथा नेमकिपाका तर्फबाट अध्यक्ष बिजुक्छे, सचिव प्रजापति र विदेश विभाग प्रमुख एवम् सांसद प्रेम सुवाल सहभागी हुनुहुन्थ्यो ।