सप्तमी बजारमा हावाबाट बिजुली निकालिने

पाँचथर, २९ असोज । जिल्लाको दक्षिणी गाविस सराङडाँडा– ८ सप्तमी बजारका स्थानीयवासीलाई लक्षित गरी हावाबाट बिजुली उत्पादन गर्न लागिएको छ ।

वैकल्पिक ऊर्जा विकास केन्द्रको लागतमा हावा मिल (विन मिल) निर्माण गर्न लागिएको सौर्य ऊर्जा उपभोक्ता समितिका अध्यक्ष सन्तोष शेर्माले जानकारी दिनुभयो । उहाँका अनुसार चार महिनाअघि परीक्षणका लागि त्यहाँ टावर जडान गरिएको छ, यो परीक्षण छ महिनासम्म गर्नुपर्छ ।

अनुमानित रु २५ लाख लागत लाग्ने सो आयोजनाबाट आठदेखि १० किलोवाटसम्म बिजुली उत्पादन गर्न सकिने छ । आयोजना सफल भएमा सप्तमी बजारका एक सयभन्दा बढी घरधुरी लाभान्वित हुने अध्यक्ष शेर्माले बताउनुभयो ।यो स्थानमा सबैभन्दा बढी हावा चल्ने भएकाले अहिले हावाको मापन गर्न टावर निर्माण गरी हावाको परीक्षण गरिरहेको समितिले जनाएको छ ।