मेलम्ची प्रशोधन केन्द्रको काम पनि इन्धनको अभावमा रोकियो

काठमाडौँ, २९ असोज । इन्धनको अभावले मेलम्ची खानेपानी आयोजनाको सुन्दरीजलमा निर्माण भइरहेको अत्याधुनिक पानी प्रशोधन केन्द्रको कामसमेत बिहीबारबाट रोकिएको छ ।

सिन्धुपाल्चोकको मेलम्ची खोलाको पानी काठमाडौँको सुन्दरीजलमा ल्याएपछि प्रशोधन गरी वितरण गर्नका लागि निर्माण भइरहेको केन्द्रको काम डिजेलको अभावले नै रोक्नुपरेको मेलम्ची खानेपानी विकास समितिले जनाएको छ ।

“आयोजनाको कामका लागि मासिक दुई लाख लिटर डिजेलको आवश्यकता पर्दछ, डिजेलकै अभावका कारण सुरुङको काम असोज १४ गतेबाट रोकिएको थियो, बिहीबारबाट प्रशोधन केन्द्र निर्माणको काम पनि रोकियो, अब इन्धन सहज नभएसम्म काम हुन सक्दैन” –समितिका कार्यकारी निर्देशक घनश्याम भट्टराईले भन्नुभयो ।

मेलम्ची खोलाबाट दैनिक ल्याइने १७ करोड लिटर पानी प्रशोधनका लागि गोकर्णेश्वर नगरपालिका–३ को महाँकालमा अधिग्रहण गरिएको १०२ रोपनी जग्गामा पहिलो चरणमा साढे आठ करोड लिटर पानी प्रशोधनका लागि केन्द्र निर्माण भइरहेको समितिका वरिष्ठ इन्जिनियर राजेन्द्रप्रसाद पन्तले जानकारी दिनुभयो । विसं २०७२ चैत मसान्तमा सक्ने सम्झौतासहित ओब्याग र प्रतिभा इन्डस्ट्रिज जेभीले केन्द्र निर्माणको काम गरिरहेका छन् ।