आमहडतालका कारणले पूजा सामग्रीको मूल्यमा वृद्धि

जनकपुरधाम, २९ असोज । मधेसवादी दलले आह्वान गरेको अनिश्चितकालीन आमहडतालका कारणले जनकपुरमा पूजा सामग्रीको मूल्यमासमेत वृद्धि भएको छ ।

हिन्दूको महान् चाड विजया दशमी सुरु भए पनि आमहडतालका कारणले सर्वसधारण मारमा पर्ने गरेका छन् । जनकपुरको विभिन्न शक्तिपीठमा भक्तजनको घुइँचो लाग्ने गरिएको भए पनि पूजाका लागि आवश्यक पर्ने सामग्रीको मूल्यमा आकासिएको छ । बन्दको कारणले करिब दुई महिना देखि यातायात सुचारु नभएकोले बाहिरबाट आउने गरिएको सामग्री आउन नसकेकोले मोल बढेको व्यापारीहरुको भनाइ रहेको छ ।

व्यापारी लक्ष्मी साहका अनुसार यातायात सुचारु नभएको कारणले बाहिरबाट सामानहरु ल्याउनमा कठिनाई भएकोले अहिले बजारमा पाउने गरिएको सामानहरु सामान्य नाफा लिएर बेच्दा समेत उपभोत्ताहरुलाई बढि मोल पर्ने गरेको हो । उहाँले अहिले नरिवलको मोल ६० रुपैया देखि १सय२० रुपैया सम्म पर्ने गरेको बताउनु भयो । सामान्य रुपमा १० रुपैयामा पाउने गरिएको चुनरीको मोल अहिले ५० रुपैया सम्म पर्ने गरेको छ ।

यातायात बन्दको कारणले व्यापारीहरुले साईकलमा सीमापारीबाट सामानहरु ल्याउने गरेका छन। जसका कारण गर्दा उनीहरु बढि नाफा लिएर बेच्ने गरेको उपभोक्ताहरुको कथन रहेको छ। दशमीमा भगवतिलाई नरिवल,चुनरी,फलफुल चढाउने परम्परा रहेको छ । तर विगतमा भन्दा यस वर्ष करिब ७५ प्रतिशतले ती सामानहरुको मोल बढेको हो ।