पूर्वसभासद् ठकुरीको सम्झनामा खुला म्याराथुन

काठमाडौँ, २९ असोज । पूर्वसभासद् स्व चक्रबहादुर ठकुरीको स्मृतिमा नेपाल विद्यार्थी सङ्घ काठमाडौँ ३ नं क्षेत्रले शान्ति, सद्भाव र एकताको नारासहित खुला म्याराथुन प्रतियोगिता आयोजना गरेको छ ।

सुन्दरीजलदेखि जोरपाटी चोकसम्म आज आयोजना गरिएको प्रतियोगितामा विभिन्न विद्यालय र क्याम्पसका २०० विद्यार्थीले भाग लिएका थिए । प्रतियोगितामा महिला र पुरुषतर्फ प्रथम द्वितीय र तृतीय हुनेलाई क्रमशः नगद पाँच हजार, तीन हजार र दुई हजारसहित ट्रफी एवम् प्रमाणपत्र वितरण गरिएको थियो ।

कार्यक्रमको उद्घाटन गर्दै सांसद एवम् नेपाली काँग्रेस काठमाडौँका सभापति भीमसेनदास प्रधानले खेलकुद प्रतियोगिताले विद्यार्थीको शारीरिक र मानसिक विकासमा सहयोग पु¥याउने बताउनुभयो ।
विजयी विद्यार्थीलाई पुरस्कार वितरण गर्दै केन्द्रीय सदस्य एवम् सांसद गगन थापाले राष्ट्रियताका सवालमा कुन दलले कति अडान लिए भन्ने रहस्यको उद्घाटन एक हप्ताभित्रै हुने बताउनुभयो ।

कार्यक्रममा काँग्रेस ३ नं क्षेत्रका कार्यबाहक सभापति कृष्णजी खड्का, सचिव श्रीकृष्ण ज्योति, महाधिवेशन प्रतिनिधि सन्तोष चालिसे र विद्यार्थी नेता कुन्दनराज काफ्लेलगायतका वक्ताले विद्यार्थीको व्यक्तित्व विकासका लागि खेलकुद कार्यक्रमको आवश्यकता रहेकामा जोड दिनुभएको थियो ।

काँग्रेस काठमाडौँ ३ नं क्षेत्रको सभापतिसमेत रहनुभएका पूर्वसभासद् ठकुरीको रसुवाको धुन्चेबाट राजधानी फर्कने क्रममा वैशाख १२ गतेको भूकम्पका कारण खसेको ढुङ्गा लागी असामयीक निधन भएको थियो । उहाँ २०६४ सालको संविधानसभा निर्वाचनमा काठमाडौँ ३ बाट विजयी हुनुभएको थियो ।