सभामुख पदमा नेमकिपाका थापाको उम्मेदवारी

काठमाडौँ, २९ असोज । नेपाल मजदुर किसान पार्टी (नेमकिपा)तर्फबाट सभामुख र उपसभामुख पदमा क्रमशः सांसद अनुराधा थापामगर र डिल्लीप्रसाद काफ्लेले उम्मेदवारी दर्ता गराउनुभएको छ ।

व्यवस्थापिका–संसद्मा आज सभामुख र उपसभामुख पदको निर्वाचन हुँदैछ । उहाँहरुले आज आफ्नो उम्मेदवारी दर्ता गराउनुभएको हो । थापाको प्रस्तावकमा सोही पार्टीका प्रेम सुवाल र समर्थकमा डिल्लीप्रसाद काफ्ले रहनुभएको छ । काफ्लेको प्रस्तावकमा अनुराधा थापामगर र समर्थकमा प्रेम सुवाल रहनुभएको छ ।

सभामुख पदको उम्मेदवारी दर्ता गराएपछि थापामगरले आफ्नो पार्टीले गरेको १२ बुँदे सहमतिका आधारमा नेकपा (एमाले)का अध्यक्ष केपी शर्मा ओलीलाई प्रधानमन्त्री पदमा मत दिएकाले अब एमालेले सभामुख तथा उपसभामुख पदमा आफूहरुलाई सहयोग गर्नुपर्ने बताउनुभयो । उहाँले भन्नुभयो – “संसदीय व्यवस्थालाई उपयोग गर्ने नीतिअनुसार देश र जनताको हितका लागि हाम्रो उम्मेदवारी हो ।”