गोरखाबाट फूलपाती भित्र्याउने प्रचलन अन्त्य

काठमाडौँ, २९ असोज । राजतन्त्रकालीन समयसम्म कीर्तिपुरको दसैँ घरमा गोरखाबाट फूलपाती भित्र्याउने प्रचलन रहे पनि गणतन्त्रको स्थापनासँगै त्यो प्रचलन अन्त्य भएको छ ।

कीर्तिपुरको उमामहेश्वर मन्दिरस्थित कोतघरमा प्राचीनकालदेखि नै दसैँमा घटस्थापना गरी फूलपातीका दिन धादिङका मगरले गोरखाबाट फूलपाती लिएर आउने प्रचलन थियो ।

प्रधान जातिको गुठी घरका रुपमा रहेको उक्त कोतघरमा प्रत्येक दसैँमा विशेष पूजाआजा हुँदै आएको छ । कीर्तिपुर जात्रा पर्व व्यवस्थापन समितिका सदस्य वीरेन्द्र शाक्यका अनुसार देशमा गणतन्त्र स्थापनासँगै उक्त प्रचलन अन्त्य भएको छ । विगतमा फूलपातीका दिन फूलपाती लिएर आउने मगर दसैँका दिनसम्म कीर्तिपुर बसी घर फर्कने गरेको स्थानीयवासी बताउँछन् ।

दसैँका दिन प्रधान जातिका महिलाले कोतघरबाट निस्की लायकु दरबार परिक्रमा गरी सिन्दूरजात्रा गरी सर्वसाधारणलाई टीका लगाइदिने गर्दछन् । नेवारी संस्कृतिमा निशा पायाका रुपमा उक्त संस्कृति मनाउने गरिएको छ ।