विद्युत् नहरमा पहिरो गएर कालीकोट अन्धकारमय

कालीकोट, २९ असोज । जिल्लाको एकमात्र जलविद्युत् गृहको नहरमा पहिरो गएपछि दसैँको मुखमा फेरि कालीकोट जिल्ला अन्धकारमय भएको छ ।

बाढीका कारण शान्तिघाट खोलाले बगाएर अवरुद्ध भएको विद्युत् आयोजना दुई वर्षपछि गत साउनमा सञ्चालनमा आएको भए पनि सुक्खा पहिरोका कारण मर्मत गरिएको ठाउँभन्दा नयाँ ठाउँमा पहिरो गएको हो । पहिरोले ३० मिटर नहर पुरिँदा बिहीबार साँझदेखि कालीकोटको विद्युत् अवरुद्ध भएको साना जलविद्युत् आयोजना कार्यालयका प्रमुख बद्रीनारायाण चौधरीले बताउनुभएको छ । उहाँका अनुसार स्थलगतरुपमा अध्ययन गर्न क्षेत्रीय कार्यालयमा प्रतिवेदन पठाएको र दसैँपछि मात्र प्राविधिक टोली आउने भएकाले तत्काल बत्ती बाल्न सकिने स्थिति छैन ।

जलविद्युत् कार्यालय कालीकोटका प्राविधिज्ञ जयप्रसाद पाण्डेले विद्युत्गृह भएको स्थान ग्रामीण क्षेत्रमा भएकाले कर्मचारीमार्फत जानकारी आएको र अनुगमन टोली पठाउने काम दसैँ पछि हुने जानकारी दिनुभएको छ ।

कालीकोट जिल्लामा पहिलो पटक निर्माण सम्पन्न भएको यो आयोजनाको क्षमता ५०० किलोवाट भएपनि विविध कारण आठ गाविसका समुदायले २५० किलोवाट मात्र प्रयोग गर्न पाएको छ ।