आज खाद्य सुरक्षा दिवस, खाद्यप्रतिकुल रहेका २६ उद्योगविरुद्ध मुद्दा

चितवन, २९ असोज । चितवनमा खाद्य प्रतिकूल फेला परेका २६ खाद्य उद्योगविरुद्ध मुद्दा दायर भएको छ ।

चितवनका जिल्ला खाद्य निरीक्षक नवीन देउजाका अनुसार यो आर्थिक वर्ष लागेपछि जिल्लामा २० पटक अनुगमन गरिएको छ । असोजमा मात्रै छपटक बजार अनुगमन गरिएको देउजाले बताउनुभयो ।

छवटा उद्योग अनुसन्धानका लागि सरकारी वकिलको कार्यालयमा गएको छ । दुईवटा खाद्य उद्योग बाहिरी जिल्लाको रहेकाले कारबाहीका लागि क्षेत्रीय खाद्य निरीक्षण कार्यालय हेटौँडा पठाइएको छ ।

आज खाद्य सुरक्षा दिवस पनि हो देशका विभिन्न क्षेत्रमा यो दिवस मनाइँदै छ । दिवसको अवसरमा जानकारी दिँदै देउजाले चितवनमा १६ वटा खाद्यपदार्थ नमुना परीक्षणका लागि केन्द्रमा पठाइएको बताउनुभयो ।

यस्तै चितवनका चारवटा डिपार्टमेन्टल स्टोर्समा मिति सकिएका खाद्य पदार्थ फेला परेको छ । अघिल्लो दुईपटकको अनुगमनमा कैफियत फेला परेका स्टोर्समा फेरि पनि मिसिएका खाद्यपदार्थ फेला परेको हो । यसरी कैफियत पाइएका खाद्य उद्योगमा पार्क वे, होप, जनसेवा र न्यु सुलभ स्टोर्स रहेका छन् । गएको वर्ष चितवनमा कुल १२१ नमुना परीक्षणका लागि पठाइएकामा त्यसमध्ये १३ उद्योगविरुद्ध खाद्य ऐनअनुसार मुद्दा दर्ता गरिएको थियो ।

अधिकांश खाद्यान्न मिति सकिएको पाइएको, कतिपयमा मिति नै नभएको पाइएको खाद्य निरीक्षण एकाइले जनाएको छ । ती खाद्यान्नमा भुजा, दाना ,पानी, पेयपदार्थलगायत तयारी खानेकुरा परेका छन् । कोक, फ्यान्टा, पेप्सीसमेत धेरै स्थानमा मिति सकिएको पाइने गरेको छ ।

ऐनविपरीत पाइएमा सम्बन्धित उद्योलाई रु १० हजार जरिवाना वा दुई वर्षको कैद अथवा दुवै सजाय हुनसक्ने व्यवस्था रहेको छ । खानेकुरा प्रयोग गरेर हानी नोक्सानी भएमा रु एक लाख क्षतिपूर्ति दिनुपर्ने व्यवस्थासमेत ऐनमा छ ।